s

‘ह्वाट्सएप’बाट ठगी

हरिप्रसाद कोइराला

उर्लाबारी, चैत १० गते । सूचना प्रविधिको पहुँच गाउँगाउँसम्म पुगेसँगै ठगी गर्ने प्रकृति पनि फेरिएका छन्। मोरङको पथरीशनिश्चरे–३, सुन्दरी चोककी २९ वर्षीय माङ्माया लिम्बू नयाँ प्रकृतिको ठगीमा पर्नुभयो।

उहाँ अहिले कानुनी उपचार खोजिरहनुभएको छ। ‘९८२८९७८३०६’ को नम्बरको मोबाइलबाट ह्वाट्सएपमार्फत माङ्मायासँग कुराकानी सुरु भयो। माङ्मायाका श्रीमान् मलेसिया जानुभएको पाँच वर्ष भयो। श्रीमान्सँग उति साह्रो फोन सम्पर्क पनि हुँदैनथ्यो।

त्यसैबेला ह्वाट्सएपमार्फत अमेरिकामा बसेको केटाले प्रेम प्रस्ताव राखेपछि उहाँको मनमा अनेक कुरा खेल्न थाले। अमेरिका बस्न पाउने सुन्दर सपना देख्दै रमाउनुभयो।

माङ्मायाले भन्नुभयो, “ह्वाट्सएपमा भिडियो कल गरेर तिमीलाई पठाउन लागेको सुनको सिक्री, नेकलेस र घडी पार्सल गर्दै छु,” भन्यो। मक्ख पर्नुभएकी माङ्माया आफ्नो उज्ज्वल भविष्यको कल्पना गर्दै सिक्री, नेकलेस, मोबाइल र घडी कुरेर बस्नुभयो। केही दिनमै अमेरिकाको एयरपोर्टमा सामान भन्सारले रोक्यो। सामान छुटाउन म भन्सार आएको छु। यसका लागि पैसा पठाउ भनेर फेरि भिडियो कल आयो।

जसले सामान रोकेको हो, उसैका नाममा पैसा पठाउन अनुरोध ग-यो। हो न हो माङ्माया पनि जसले सामान रोकेको हो उसैलाई पैसा पठाएपछि सामान छोडिदिन्छ होला भन्ने भ्रममा पर्नुभयो। उहाँले आईएमईमार्फत पैसा पठाउन थाल्नुभयो।

उसले आफ्नो नाममा पैसा पठाउनु भनेन। हरेक पटक पैसा पठाउँदा उसले बेग्ला बेग्लै बैङ्क र खातामा फरकफरक कामका लागि भनेर पैसा माग्यो। जसले गर्दा माङ्माया विश्वासमा पर्नुभयो। उहाँ भन्नुहुन्छ, “उसले आफ्नो नाम रवि शर्मा भन्थ्यो। मैले रवि शर्माको नाममा कहिल्यै पैसा पठाइन।”

माङ्मायाले विभिन्न बहानामा हालसम्म दुई लाख रुपियाँ पठाइसक्नुभएको छ। उहाँकी दिदी दिलु लिम्बूले भन्नुुभयो, “बहिनीले चार आना सुन बिक्री गरेर र दुई तोला सुन धरौटी राखेर एक लाख ७५ हजार रुपियाँ पठाइछ। अरू आफैँसँग भएको २५ हजार पनि सुरुमै पठाएको रहेछ।” सुरुका दिनमा कसैलाई नभनी सुटुक्क पैसा पठाउनुभएकी माङ्मायाले १५ दिनको बीचमा दुई लाख पठाएपछि रविले गर्न र फोन उठाउन पनि छोडेपछि झस्किनुभयो। त्यसपछि मात्र आफू ठगिएको थाहा पाएर हारगुहार गर्नुभयो।

इलाका प्रहरी कार्यालय पथरीका प्रहरी नायब उपरीक्षक लक्ष्मी भण्डारीले साइबर अपराधका घटनासँग आफैँ जोेगिनुपर्ने बताउनुभयो। यस्ता अपराधको अनुसन्धान केन्द्रीय साइबर ब्युरोले हेर्ने भएकोले आएका उजुरीलाई माथिल्लो निकायमा पठाउने काम मात्र इलाका प्रहरी कार्यालयले गर्ने उहाँको भनाइ छ।

Published on: 24 March 2023 | Gorkhapatra

Link

Back to list

;