भारत उत्तर प्रदेश राज्यमा एकजना नेपाली विद्यार्थीको उनकै साथीद्वारा हत्या भएको छ। हापुर जिल्लामा विशाल शुक्ला नामक नेपाली विद्यार्थीको साथीहरूकै कुटाइबाट ज्यान गएको हो। उनी सर्लाही सिरौत गाविसका बासिन्दा हुन्। दुई दिनअघि भएको यो घटनाले विदेशी विद्यार्थीहरू भारतमा कति असुरक्षित छन् भन्ने कुरा देखाएको छ।

विशाल उत्तर प्रदेशको मोनाद विश्वविद्यालयको मेकानिकल इन्जिनियरका दोस्रो वर्षका विद्यार्थी हुन्। हत्याको विरोधमा दिल्लीको बाराखम्बारोडस्थित नेपाली दूतावासमा मृतकका परिवार र साथीहरूले प्रदर्शन गरेका छन्। उनीहरूले विशालको हत्यामा संलग्नहरूलाई कारबाही गर्न प्रहरीले पर्याप्त ध्यान नदिएको आरोप लगाएका छन्। विशालका आफन्तलाई शव बुझन प्रहरीले दबाब दिएको आरोप उनीहरूले लगाएका छन्। 'प्रहरीले पोस्टमार्टम प्रतिवेदन दिएन।

विशालकी बहिनीलाई कागजमा जबरजस्ती हस्ताक्षर गर्न लगाएर शव बुझ्न लगाइयो', विशालका काकाले भने। विशालका बाबु राम शुक्लाले रुँदै भने, 'म गरिब किसान हुँ। छोराको पढाइका लागि सबै थोक बेचिसकेको छु।'

दूतावासका प्रहरी एटाची एसएसपी राजेन्द्रमान श्रेष्ठले आफूहरूले मृतकका परिवारका सहयोगका लागि प्रयत्न गर्ने बताए। केही व्यक्तिले बुधबार साँझ ४-५ बजे विशाल तथा उनका साथी मनीष शर्मालाई छालाको पेटीले हिर्काएका थिए। केही समयअघि देखि सोही विश्‍वविद्यालयमा अध्ययनरत स्थानीय युवाले सोनु भनिने विशाललाई हैरानी गर्दै आएको बुझिएको छ। 'कलेजबाट करिब १५ किलोमिटरका दूरीमा पर्ने एनएच २४ मा चारवटा मोटर साइकलमा आएका आठजना युवाले हामीमाथि आक्रमण गरे', मनीषले भने, 'मैले मोटरसाइकल चलाइरहेको थिएँ।

मोटरसाइकल पछाडि विशाल बसेका थिए। उनीहरूले हामीलाई पेटीले हिर्काउन थाले। हामी मोटरसाइकलबाट लड्यौं। विशालको माथिबाट उनीहरू कुदे। लडेको केही समयपछि म उठें। मैले विशाल मरेको महसुस गरे।'

मनीष नयाँदिल्लीको गाजियाबादका बासिन्दा हुन्। मनीषका अनुसारमा गौरव, सौरभ तथा विवेकले आक्रमण गरेका थिए। आक्रमणलगत्तै सरस्वती अस्पताल पुर्‍याइएका विशाललाई चिकित्सकले मृतक घोषित गरेका थिए। प्रहरीले घटनामा संलग्न भएको आरोपमा कसैलाई पक्राउ गरेको छैन।

Published on: 13 September 2014 | Annapurna Post